Waqti Luminta Iyo Ka Hortageeda

Waqtigu waa mid ka mid ah waxyaabaha ugu qiimaha badan ee qofku haysto, qof kasta oo ku nool dunida waqti isku mid ah ayaa la haystaa, balse waxaa lagu kala duwan yahay sida loo ilaashado. Mararka qaar si fudud ayuu u lumi karaa waqtigu isaga oo aan la dareemin. Saacado badan ayaa ku baxa baraha bulshada, sheekooyin aan macno  lahayn, daawashada waxyaabo aan faa’iido lahayn ama dib u dhigista hawlaha muhiimka ah. Marka waqtigu tago, dib looma soo celin karo. Sidaas darteed, barashada sida loo ilaashado waqtiga waa tallaabo muhiim ah oo lagu dhisayo nolol nidaamsan, wax-ku-ool ah oo leh ujeeddo.

 Faham Meelaha Waqtigaagu Ku Lumayo

Tallaabada ugu horreysa waa inaad ogaato waxa waqtigaaga qaata. Qofku mararka qaar wuxuu u malayn karaa inuu mashquul yahay, laakiin marka uu si dhab ah u fiiriyo maalintiisa, wuxuu ogaan karaa in waqti badan ku baxay waxyaabo aan muhiim ahayn. Qor hawlaha aad qabato maalin kasta oo eeg kuwa aan natiijo muuqata kuu keenin.

Is weydii: Immisa saacadood ayaan ku qaataa telefoonka? Immisa jeer ayaan hawl muhiim ah dhexda uga tagaa? Maxaa iga dhigaya inaan dib u dhigo shaqadayda? Immisa saacadood ayaan ka faa’idaystaa waqtiga Immisa ayaa se iga khasaarta? Jawaabaha su’aalahan waxay kuu fududaynayaan inaad ogaato meelaha u baahan isbeddel.

 Samee Mudnaanta Waxyaabaha Muhiimka ah

Dhammaan hawlaha noloshu isku qiimo ma aha. Qaar waxay leeyihiin saameyn weyn, halka qaar kalena ay yihiin wax lagu mashquulo oo keliya. Haddii aad rabto inaad joojiso waqtiga ku lumaya macno-darrada, baro inaad kala saarto waxa muhiimka ah iyo waxa aan muhiimka ahayn.

Bilow maalintaada adigoo dooranaya saddex ama afar hawlood oo muhiim ah. Marka hawlaha muhiimka ah la dhammeeyo, waxaad dareemaysaa horumar iyo qanacsanaan. Qorshe fudud oo aad si joogto ah u raacdo ayaa ka waxtar badan qorshe weyn oo aan la fulin.

Yaree Isticmaalka Waxyaabaha Mashquulka Keena

Telefoonka, baraha bulshada iyo ogeysiisyada joogtada ahi waxay si fudud u kala gooyaan feejignaanta qofka. Waxaad damacsan tahay inaad telefoonka isticmasho shan daqiiqo, balse waxaad ogaan kartaa in nus saac iyo ka badan aad ku jirtay oo dhamaatay.

Samee waqtiyo gaar ah oo aadan telefoonka iyo baraha bulshada isticmaalayn. Inta aad qabanayso hawl muhiim ah, dami ogeysiisyada aan loo baahnayn oo telefoonka meel kaa fog dhig. Tani waxay kaa caawin kartaa inaad si fiican  diiradda u saarto waxa aad qabanayso.

 Ka Fogoow Dib-u-dhigista Hawlaha Muhiimka ah

Dib-u-dhigistu waa mid ka mid ah sababaha ugu waaweyn ee waqtigu u lumo. Qofku wuxuu ogaan karaa waxa uu qabanayo, laakiin wuxuu mar walba raadiyaa sababta uu u bilaabi waayay. Hawsha oo la sugo waxay badanaa keentaa cadaadis iyo waqti dheeraad ah oo lumaya.

Haddii hawshu u muuqato mid adag, ha isku dayin inaad hal mar wada dhamayso. U qaybi qaybo yaryar oo la qaban karo. Mararka qaar waxa ugu adag waa bilowga oo keliya. Marka aad bilowdo, hawshu waxay kuu muuqan kartaa mid ka fudud sidii aad filaysay.

 Baro Inaad Maya Tiraahdo

Waqtigaaga waxaa laga yaabaa inuu ku lumo waxyaabo ay dadka kale kaa rabaan. Inaad qof walba raalli geliso mar kasta waxay kaa qaadi kartaa waqti aad u baahan tahay inaad ku maalgeliso naftaada iyo yoolalkaaga.

Maya oo si edeb leh loo yiraahdo ma aha xumaan. Waa hab aad ku ilaalinayso mudnaantaada. Kahor intaadan aqbalin hawl cusub, is weydii haddii ay muhiim tahay, haddii ay waafaqsan tahay yoolalkaaga iyo haddii aad dhab ahaan waqti u hayso.

 Dhis Nolol Leh Ujeeddo iyo Nidaam

Ugu dambayn, waqtiga si wanaagsan loo isticmaalo wuxuu u baahan yahay ujeeddo cad. Marka aad garanayso waxa aad rabto inaad nolosha ka gaadho, iyo habkii aad u mari lahayd, way fududaanaysaa inaad diido waxyaabaha waqtigaaga si aan faa’iido lahayn u qaadanaya.

Gunaanad

Waqtiga lumaya mar walba ma aha saacado badan oo hal mar  baxaya, mararka qaar wuxuu ku yimaadaa daqiiqado yaryar oo maalin kasta la dayaco. Ogaanshaha meelaha waqtigu ku lumo, qorshaynta hawlaha muhiimka ah, yaraynta waxyaabaha ku mashquuliya, ka fogaanshaha dib-u-dhigista iyo ilaalinta mudnaantaada waxa kuu leh waxay kaa caawin karaan inaad si wanaagsan u maamusho maalintaada iyo waqtigaaga. Ha sugin maalin ku habboon oo aad isbeddel ku samayn doonto. Ka bilow maanta, xitaa tallaabo yar, sababtoo ah waqtiga aad maanta si wanaagsan u isticmaasho wuxuu qayb ka noqon karaa mustaqbalka aad berri dhisayso.